Kayrami palang search engine

KAYRAMI PALANG SEARCH ENGINE

natutunan ko sa isang palaisipan

na sa internet pala'y kayraming search engine

lalo't mananaliksik kang may hinahanap

mga impormasyong dapat mabasa man din

nariyan ang Rambler, Infospace, Blekko, Yahoo,

Altavista, Gigablast, Webopedia, Blingo,

Yandex, Google, Dogpile, Naver, Lycos, Otalo,

Excite, Hotbot, Mamma, Yippy, Iwon, Mahalo

samutsaring makina sa pananaliksik

Yahoo at Google lang ang madalas kong gamit

ang iba'y susubukan kong may pagkasabik

lalo't may hinahanap ako't hinihirit

salamat at may Word Search o Hanap Salità

at ganitong datos ay nahanap kong biglâ

- gregoriovbituinjr.

12.27.2025

Hayaan n'yong magkwento ako

HAYAAN N'YONG MAGKWENTO AKO

hayaan n'yong magkwento ako sa bawat sandali

pagkat pagkukwento naman ay di minamadali

salaysay ng mga nangyari, dinanas at sanhi

hanggang itanong sa sarili, anong aking mithi?

bakit mga trapong kurakot masamâ ang budhi?

ang Paskong tuyó ba'y pagtitiis lamang sa tuyó

may letson nga subalit ang buhay ay nanunuyô

pagkat walâ na ang tanging pagsintang sinusuyò

kahit tahakin ko man ang ilaya hanggang hulô

di ko na batid kung paano tupdin ang pangakò

hayaan n'yong makathâ ko pa ang nobelang nais

upang kamtin ang asam na tagumpay na matamis

sa kabilâ ng mga naranasang pagtitiis

hanggang aking matipunong katawan ay numipis

- gregoriovbituinjr.

12.25.2025

Bawal mapagod

BAWAL MAPAGOD

bawal mapagod ang diwà, puso't katawan

magpahinga pa rin ng madalas at minsan

habang naghahanda sa matitinding laban

sa pagsulat at pagkilos para sa bayan

matulog tayo ng walong oras, ang sabi

payò ng matatanda'y sundin araw-gabi

walong basong tubig ang inuming mabuti

katawa'y ipahinga kahit super-busy

minsan, hatinggabi'y gising pa't nagsusulat

nang musa ng panitik ay naritong sukat

antok ako'y di na pinigilang magmulat

upang likhain ang tulang may tugma't sukat

O, Musa ng Panitik, diwa ko't diwatà

pagkat likhang tula'y aking tulay sa madlâ

- gregoriovbituinjr.

12.20.2025

Naglalakad pa rin sa kawalan

NAGLALAKAD PA RIN SA KAWALAN

nakatitig lamang ako sa kalangitan

tilà tulalâ pa rin doon sa lansangan

parang si Samwel Bilibit, lakad ng lakad

sa pagkawalâ ni misis, di makausad

lalo na't magpa-Pasko't magba-Bagong Taon

wala pa ring malaking isdang nakukulong

aba'y baka walâ pang limang daang piso

ang aking Noche Buena pagkat nagsosolo

isang kilong bigas, limampung pisong tuyô

malunggay, bawang, sibuyas, kamatis, toyò

walang ham, isang Red Horse, at matutulog na

iyan ang plano ng makatang nag-iisa

lakad ng lakad, nag-eehersisyo man din

pag-uwi ng bahay, hihiga na't hihimbing

- gregoriovbituinjr.

12.18.2025

* mapapanood ang bidyo sa kawing na: https://www.facebook.com/share/r/17zo5Ba6Rw/ 

Pagpupugay at pasasalamat, CHR!

PAGPUPUGAY AT PASASALAMAT, CHR!

natanggap ko ang backback ng Biyernes

sa isang forum para sa C.S.O.

may sertipiko pa't payong ng Martes

sabay ng araw ng Lunsad-Aklat ko

may tatak na C.H.R. at islogan

ang backpack at payong na ibinigay

na "Naglilingkod Maging Sino Ka Man"

nag-isip niyon ay napakahusay

kaylalim ng tungkuling ipagtanggol

natin bawat karapatang pantao

sa anumang paglabag tayo'y tutol

pagkat karapatan nati'y sagrado

sa C.H.R., maraming salamat po!

pagpupugay itong mula sa puso!

- gregoriovbituinjr.

12.16.2025

Taospusong pasasalamat sa tshirt

TAOSPUSONG PASASALAMAT SA TSHIRT

tinanong muna ako ng isang kasama

kung anong size ng tshirt ko, medium, sagot ko

sunod na tanong niya, ako ba'y lalahok

sa rali o pagkilos patungong Mendiola

sabi ko'y oo, di ako pwedeng mag-absent

lalo't sa Araw ng Karapatang Pantao

doon ay nagkita kami't kanyang binigay

ang tshirt hinggil sa karapatang pantao

lubos at taospusong nagpapasalamat

ang abang makata sa tshirt na natanggap

tshirt man iyon ngunit nakapagmumulat

ako'y binigyang halaga't di nalimutan

sa iyo, kasama, salamat, pagpupugay

nawa ang katulad mo'y dumami pang tunay

- gregoriovbituinjr.

12.15.2025

Gutom na kayâ ngumiyaw sa pintô

GUTOM NA KAYÂ NGUMIYAW SA PINTÔ

pusa'y marunong din palang kumatok

upang mabigyan siya ng pagkain

pusang galâ siyang nadama'y gutom

batid din niya paano tumayming

kauuwi ko lang kasi ng bahay

galing sa labas, may inasikaso

pagod, balak kong magpahingang tunay

saka na harapin ang dokumento

paano ko nga ba matatanggihan

ang pusang galang nahuli'y bubuwit

minsang ako'y nagising sa higaan

isang gabing ang ulo ko'y masakit

at binigyan ko siya ng galunggong

sana'y makabusog sa kanya iyon

- gregoriovbituinjr.

12.15.2025

* mapapanood ang bidyo sa kawing na: https://www.facebook.com/share/r/1HB3cAYtt2/

Panalo nga ba?

PANALO NGA BA?

nakasulat: "Lahat ng pack, panalo!"

sa baba: "Smoking causes foot gangrene"

kaya ang tanong: tunay bang panalo?

ang ad ay kabalintunaan man din

sa kabila, "ang paninigarilyo

ay sanhi ng pagkaagnas ng paa"

ngunit sabi'y "Lahat ng pack, panalo'"

sa agnas na paa'y panalo nga ba?"

kabalintunaan ang patalastas

di ka talaga panalo sa ganyan

ngunit dahil negosyante'y malakas

balintuna man, pinagtutubuan

binibilog na ang ulo ng madlâ

subalit ito'y tila balewalâ

- gregoriovbituinjr.

11.27.2025

Sampung pisong buko

SAMPUNG PISONG BUKO

buti na lang, may sampung pisong buko

na araw-araw ay naiinom ko

imbes na soft drinks, lambanog o kape

sampung pisong buko pa'y mas maigi

pagkat pampalakas na ng katawan

ay mabuti pa sa puso't isipan

tubig ng buhay at nakabubuhay

lunas sa karamdaman, pangingimay

sampung pisong buko, napakamura

nagtitinda nito'y kapwa mahirap

h'wag sanang kunin ng kapitalista

baka dukha'y malugi sa sang-iglap

sampung pisong buko'y ating inumin

at magandang kalusugan ay kamtin

- gregoriovbituinjr.

11.27.2025

Ako ma'y isang tinig sa ilang

AKO MA'Y ISANG TINIG SA ILANG

ako'y isa raw tinig sa ilang

walang nakikinig, tila hunghang

kayraming tao sa kalunsuran 

ay tila ba nasa kaparangan 

salitâ nang salitâ nang gising

tulâ ng tulâ ay nanggigising

ng mga tulog na kaisipan

ng mga himbing pa sa higaan

sumisigaw laban sa kurakot

na di napapakinggan ng buktot

na trapo, burgesya, dinastiya,

tusong kuhilà, oligarkiya

nananatiling tinig sa ilang

ang makatang di pinakikinggan 

- gregoriovbituinjr.

11.23.2025

Payak na hapunan ng tibak na Spartan

PAYAK NA HAPUNAN NG TIBAK NA SPARTAN

sibuyas, kamatis at bawang pinagsama

habang tuyong hawot ay ipinirito pa

payak na hapunan ng tibak na Spartan

na nag-iisa na lang sa abang tahanan

nagsaing muna, sunod ay ang paglalaba

at naglinis din sa tinahanan ng sinta

nagkusot, nagbanlaw, labada'y pinigaan

niluto'y hawot pagkagaling sa sampayan

simpleng pamumuhay lang kasama ng masa

simpleng pagkain lang habang nakikibaka

simpleng tulâ lang ang alay sa santinakpan

simpleng buhay lang na handog sa sambayanan

tara, mga katoto, saluhan n'yo ako

sa payak mang hapunan ay magsalo-salo

- gregoriovbituinjr.

10.30.2025

Kandilà

KANDILÀ

nagpakita / ang kandilà / sa palengke

nagparamdam / kayâ agad / kong binili

tila sinta / sa akin ay / may mensahe

h'wag daw akong / sa lansangan / magpagabi

taospusong / pasalamat / yaring alay

nadama ko / ang pagsinta / niyang tunay

may trabaho / o sa bahay / nagninilay

tila ngiti / niya'y aking / nasisilay

mamaya nga'y / magsisindi / ng kandilà

paggunita / sa maagang / pagkawalâ

ng asawang / laging nasa / puso't diwà

hanggang ngayon / nariritong / nagluluksâ

ngayong undas, / pag-alala'y / mahalaga

ako'y balo / na't walâ nang / kaparehâ

- gregoriovbituinjr.

10 30.2025

Sa pagtulâ

SA PAGTULÂ

di ko dineklarang bawat araw may tulâ

bagamat iyon na ang aking ginagawâ

inilalarawan ang samutsaring paksâ

saya, rimarim, libog, luha, lupâ, luksâ

maralita, kabataan, vendor, obrero

kababaihan, batà, magbubukid, tayo

pagtulâ na kasi'y pinakapahinga ko

mula tambak na gawain, laksang trabaho

tulâ ng tulâ, sulat ng sulat ng sulat

nagbabakasakaling ang masa'y mamulat

kumilos laban sa mga nangungulimbat

ng pondo ng bayan, mga korap na bundat

ako'y tutulâ ng nasa diwa't damdamin

tula'y tulay sa pagtulong sa bayan natin

- gregoriovbituinjr.

10.30.2025

Ginisang sardinas na may malunggay

GINISANG SARDINAS NA MAY MALUNGGAY

may dalawang sanga ng malunggay

at may isang lata ng sardinas

tiyak na namang ako'y didighay

muling gaganahan at lalakas

may kamatis, bawang at sibuyas

nilagay ang kawali sa kalan

sabaw ay unab o hugas-bigas

kalan ay akin nang sinindihan

nilagyan ng kaunting mantikà

sibuyas at bawang na'y ginisa

pati kamatis at sardinas ngâ

unab, malunggay, pinaghalo na

tara, katoto, saluhan ako

tiyak, masasarapan ka rito

- gregoriovbituinjr.

10.26.2025

Itlog at okra sa inin-in

ITLOG AT OKRA SA ININ-IN

bago tuluyang main-in ang kanin

isinapaw ko ang apat na okra

at naglagay ng puwang sa inin-in

upang doon itlog ay lutuin pa

ang kawali'y di na kinailangan

upang mapagprituhan nitong itlog

okra'y in-in na ang pinaglagaan

sa hapunan ay kaysarap na handog

anong laking tipid pa sa hugasin

isapaw lang, aba'y ayos na ito

sa buhay na payak, may uulamin

pag sikmura'y kumalam na totoo

mga katoto, tarang maghapunan

ulam sana'y inyong pagpasensyahan

- gregoriovbituinjr.

10.25.2025

Pandesal, salabat at malunggay tea

PANDESAL, SALABAT AT MALUNGGAY TEA

payak lamang ang aking inalmusal

malunggay tea, salabat at pandesal

sa iwing resistensya'y pampatagal

sa takbuhan, di ka agad hihingal

ngunit mamaya, mahabang lakaran

tungo sa mahalagang dadaluhan

dapat may pampalakas ng katawan

at pampatibay ng puso't isipan

anupa't kaysarap magmuni-muni

pag nag-almusal, nagiging maliksi

ang kilos, susulat pang araw-gabi

ng akdang sa diwa'y di maiwaksi

tarang mag-almusal, mga katoto

pagpasensyahan lang kung konti ito

- gregoriovbituinjr.

10.25.2025

Payabat at Arô

PAYABAT AT ARÔ

sa Anim Pababâ: Pangingitlog ng isdâ

at sa Labing-isa Pahalang: Munting bilog

ay, di ko batid ang gayong mga salitâ

tila baga kaylalim ng pananagalog

sinagot agad ang Pahalang at Pababâ 

hanggang lumabas na kung anong tamang tugon

PAYABAT pala ang pangingitlog ng isdâ

at ARÔ ang maliit na bilog na iyon

dagdag kaalaman sa wikang Filipino

na dapat kong itaguyod bilang makatâ

na nais kong ibahagi kahit kanino

upang mapaunlad pa ang sariling wikà

maraming salamat sa PAYABAT at ARÔ

mga katagang kay-ilap na tila gintô

- gregoriovbituinjr.

10.23.2025

* krosword mulâ sa pahayagang Pilipino Star Ngayon, Oktubre 23, 2025, p 10

* Payabat in English: Definition of the Tagalog word payabat 

https://www.tagalog.com/dictionary/payabat 

Ang taong pinili mo, kaysakit pag nawala sa iyo

ANG TAONG PINILI MO, KAYSAKIT PAG NAWALA SA IYO

(Sa ikaapat na DEATH Monthsary ni misis)

ang taong pinili mo, kaysakit pag nawala sa iyo

pinili ko ang aking asawa, pinili niya ako

sumumpâ sa mayor, sa tribu, sa altar, sa kasaysayan

na magsasama sa ginhawa, hirap, saya't kalungkutan

kumpara sa magulang at kapatid, mas ramdam ang sakit

pag nawala ang minamahal mo't sinamahan sa gipit

kaysa mga taong kinagisnan ngunit di mo pinili

na minahal mo rin ngunit marahil di gayon kahapdi

ipagpaumanhin, iyan ay sarili ko lang pananaw

nami-miss ko siya't di mapagkatulog sa gabi't araw

tunay ngang ibang-iba ang kapangyarihan ng pag-ibig

napapanaginipan ko pa ang maganda niyang tinig

sa rali nga'y mandirigmang Spartan akong nakatayô

na sa pag-iisa, lumuluha ako't nakatalungkô

- gregoriovbituinjr.

10.11.2025

Mga gurô ang nasa headline ngayon

MGA GURÔ ANG NASA HEADLINE NGAYON

pawang mga gurô ang headline ngayong araw

sa dalawang diyaryo, gurong dapat tanglaw

magkaibang balitang karima-rimarim

mga suspek ay gurô, biktima'y gurô rin

sa una, dalawang guro'y nangmolestiya

ng mga estudyante, dalawa'y buntis na

sa ikalawa, guro't syota ay nagtalo

dahil daw sa nakawalang alagang aso

bunga nito'y pinaslang ng tibô ang gurô

yaong balat at tinalupan ay naghalò

pawang mga balitang di mo maiisip

dahil pag guro'y respeto agad ang lirip 

hustisya sa mga biktima nawa'y kamtin

at mga suspek ay madakip at litisin

- gregoriovbituinjr.

10.10.2025

* mga ulat mula sa pahayagang Abante Tonite at Pang-Masa, Oktubre 10, 2025, p.1 at 2

Gulay sa hapunan

GULAY SA HAPUNAN

iwas-karne at mag-bedyetaryan

pulos gulay muna sa hapunan

ganyan ang buhay ng badyetaryan

batay sa badyet ang inuulam

sa katawan natin pampalakas

ang mga gulay, wala mang gatas

may okra, kamatis at sibuyas

pulos gulay na'y aking nawatas

iyan ang madalas kong manilay

upang kalamnan nati'y tumibay

payo rin ito ng aking nanay

kaya kalooban ko'y palagay

sa hapunan, ako'y saluhan n'yo

at tiyak, gaganahan din kayo

- gregoriovbituinjr.

10.10.2025

Oktubre 9 sa kasaysayan

OKTUBRE 9 SA KASAYSAYAN

pinaslang ang rebolusyonaryong si Che Guevara
taga-Argentina, pinatay sa bansang Bolivia

unang pinatugtog sa radio sa buong daigdig
ang awiting Imagine ni John Lennon ay narinig

isang lupon ang tinatag ng mga mambabatas
upang akdain ang Konstitusyon ng Pilipinas

itinatag ang paaralang Yale University
at nagdiborsyo sina Elvis at Priscilla Presley

ang sewing machine ni Singer ay naimbento naman
at lumindol sa Pakistan, India, Afghanistan

bansang Cambodia naman ay naging Khmer Republic
ang mga nabanggit, sa kasaysayan natititik

magkakaibang taon, magkakaibang balita
na sa petsa Oktubre Nuwebe nangyaring sadya

- gregoriovbituinjr.
10.09.2025

* pinagbatayan ay mula sa pahayagang Pang-Masa, Oktubre 9, 2025, pahina 4

Sa tambayan

SA TAMBAYAN

nasa Fiesta Carnival muli ako, O, sinta

doon sa dati, sa tinatambayan ko madalas

muling kumakatha habang naaalala kita

tayo'y nag-usap anong panonooring palabas

oo, madalas, doon mo ako pinupuntahan

agad magkukwento ka pagkagaling sa trabaho

kaytamis ng ngiti mo't agad akong susulyapan

habang ako nama'y nakikinig sa iyong kwento

ako'y nag-iisa na lang sa Fiesta Carnival

habang inaalagata ang nakaraan natin

habang doon sa tabi-tabi ay nagmiminindal

aba'y anong sarap pa ng ating mga kutkutin

hanggang dito na lang muna, O, diwata ko't irog

nagunita ka lang ng pusong nagkalasog-lasog

- gregoriovbituinjr.

10.08.2025

Mukhang Senior na kasi si Junior

MUKHANG SENIOR NA KASI SI JUNIOR

sa dulo ng ngalan ko'y may Junior

aba'y mukha na raw akong Senior

kaya pamasahe imbes kinse

sa minibus, singil nila'y dose

bago mag-Senior, ilang taon pa

ngunit nangalahating siglo na

aba'y dapat wala pang diskwento

ngayon, meron na't ubanin ako

salamat naman at nakatipid

ang mula sektor ng sagigilid

kung may Senior I.D., di nagtanong

na sana'y masasagot ko iyon

di pa ako Senior, sasabihin

ko't diskwento'y tiyak babawiin

- gregoriovbituinjr.

10.08.2025

Imbis iprito ang itlog, isapaw sa iniinin

IMBIS IPRITO ANG ITLOG, ISAPAW SA INIININ

imbis iprito ang itlog

isapaw sa iniinin

wala nang mantikang sahog

sasarap pa itong kain

payak na diskarte lamang

nakatipid pang totoo

sa paggamit nitong kalan

o kuryente sa luto mo

sapaw-sapaw lang sa kanin

at may uulamin ka na

walang hirap na lutuin

parang sinapaw na okra

salamat sa inyong payò

nakatipid, walang luhò

- gregoriovbituinjr.

10.03.2025

* may munting bidyo sa kawing na: https://www.facebook.com/share/r/16FsVaYcnw/ 

Palakad-lakad sa kawalan

PALAKAD-LAKAD SA KAWALAN

palakad-lakad lang ang makatang tulala

bagamat nakaiiwas sa mga baha

palakad-lakad, maganda raw ehersisyo

sabi ng mga atletang nakausap ko

palakad-lakad man subalit nagninilay

pinaglilimian ang mga bagay-bagay

buti't di nahuhulog sa manhole o kanal

palakad-lakad bagamat natitigagal

ang makatang palakad-lakad sa kawalan

kung matulin pag natinik ay malaliman

ika nga ng kasabihan ng matatanda

kaya sa paglalakad, huwag matulala

salamat, salamat sa inyong mga payo

upang lakad ay diretso, di biglang liko

- gregoriovbituinjr.

09.10.2025

* mapapanood ang munting bidyo sa kawing na: https://www.facebook.com/share/v/19mEmf13aZ/ 

Soneto sa PANTHER

SONETO SA PANTHER

Participation - lumalahok ang bawat kasapian

Accountability - bawat isa'y may pananagutan

Non-discrimination - walang sinuman ang naiiwan

Transparency - walang tinatago sa masa't samahan

Human dignity - paggalang sa dignidad ng sinuman

Empowerment - pagsakapangyarihan ng mamamayan 

Rule of law - iginagalang ang mga batas ng bayan

Pagpaplano ng samahan upang kamtin ang layunin

Ay ginagawa ng seryoso't pananagutan natin

Nangangarap ng makataong lipunang dapat kamtin

Tagumpay ng samahan ay lagi nating iisipin

Habang hindi pinababayaan ang pamilya natin

Edukasyon ng bawat kasapi ay ating planuhin

Respeto sa batas at sa bawat isa'y ating gawin

- gregoriovbituinjr.

08.27.2025

* ang soneto ay tulang may sukat at tugma, at binubuo ng 14 pantig bawat taludtod

* ang PANTHER ay isa sa mga prinsipyo ng karapatang pantao

Litisin si Lustay

LITISIN SI LUSTAY

ang sigaw ng marami: Impeach Lustay!

hustisya sa taumbayan ang hiyaw!

panawagan sa S.C.: Impeach Lustay!

ayaw namin kung bise'y nagnanakaw!

bakit ebidensya'y di ipakita

na nais mabatid ng taumbayan

kayrami nang salaping ibinulsa

mula sa buwis at kaban ng bayan

bigyan pa rin ng due process si Lustay

di tulad ng pinaslang o tinokhang

walang due process, kinitil ang buhay

karapatang pantao'y di ginalang

sana'y makinig ang Korte Suprema

at Senado: Impeach Lustay, Ngayon Na!

- gregoriovbituinjr.

08.11.2025

Pinikpikan sa pang-apatnapung araw

PINIKPIKAN SA PANG-APATNAPUNG ARAW

nagpinikpikan habang inalala

ng angkan ang pang-apatnapung araw

ng pagkawala ng aking asawa

habang ramdam ko pa rin ay mapanglaw

isa nang tradisyon ang pinikpikan

bilang alay, bilang pasasalamat

sa lumikha nitong sansinukuban

habang ramdam ko pa rin yaong bigat

sa dibdib, tila sangkaterbang bato

ang nakadagan, buti't di sumikip

ang dibdib, nakakatayo pa ako

habang si misis ang nasasaisip

magpapatuloy pa rin yaring buhay

sa kabila ng nadaramang lumbay

- gregoriovbituinjr.

07.23.2025

Krimen sa sanggol

karumal-dumal, karima-rimarim

ang ginawa ng ina'y anong lagim

ang kanya bang budhi'y sadyang maitim?

o kanyang pag-iisip ay nagdilim?

ayon sa balita, may diperensya

sa pag-iisip ang nasabing ina

at sa krimen ba'y mananagot siya?

sino nga ba tayo upang manghusga?

subalit ang nawala'y isang buhay

labing-isang buwang bata'y namatay

ang nangyari'y sadyang nakalulumbay

sa krimeng ito ba'y mapapalagay

ano't kay-agang nawala ng sanggol

ang buhay niya'y agad naparool

- gregoriovbituinjr.

07.23.2025

* ang ulat ay headline (tampok na ulat) sa pahayagang Abante Tonite, Hulyo 23, 2025

Antok pa si alaga

ANTOK PA SI ALAGA

nang dahil sa pag-ulan, kaysarap

ng kanyang paghimbing, nangangarap

tiyak na ginaw ang nalalasap

ni alagang dito'y nililingap

kaya masarap dapat ang kain

niya mamaya, isda pa man din

ang ulam, dapat lang unawain

si alagang pag-amot ay dinggin

ilang araw na bang bumabaha

ilang araw ding basa ang lupa

ilang araw ding walang nagawa

upang makapanghuli ng daga

anong sarap naman ng umaga

sige lang, matulog ka lang muna

- gregoriovbituinjr.

07.23.2025

* mapapanood ang bidyo sa kawing na: https://web.facebook.com/share/v/12FrqbYjUea/